зақымдалған аймақтардан өту

(Преодоление зон поражения)

әскерлердің (күштердің) ұрыстық, ұрыс алдындағы және жорықтық реттермен, жауынгерлік қабілеттіліктерін барынша сақтап және жауынгерлік міндеттерді орындай отырып зақымдалған және қираған өңірлерден ұйымдасқан түрде өтуі. Бұл осындай өңірлерді айналып өту немесе әскерлерді тікұшақтар және ұшақтармен алып өту мүмкіндігі болмаған жағдайларда жүзеге асырылады. Өту тәсілдерін нақты ұрыстық жағдайға, бөлімшелер мен бөлімдердің қорғалу дәрежесіне, олардың орындайтын міндеттерінің мазмұнына, жергілікті жер мен ауаның радиоактивті зақымдану дәрежесіне, қирау сипатына, жергілікті жердің жағдайына, өңірдің әскерлердің жүру бағытына қатысты жағдайына және олардың аумағына байланысты командирлер анықтайды. Радиоактивті зақымдалған аймақтардан екі тәсілмен: радиация деңгейінің төмендеуін күтпей бірден және радиацияның жоғары деңгейі төмендегеннен кейін өтіледі. Құрамында әр түрлі деңгейде қорғалған бөлімшелері бар құрамалар мен бөлімдер бұл тәсілдерді аралас түрде қолданады: сауытты машиналардағы бөлімшелер мен бөлімдер аймақтардан бірден өте алады, ал автомобильдермен жылжитын әскерлер радиация деңгейі белгілі бір дәрежеге төмендегеннен кейін өтеді. Радиоактивті зақымдалған аймақтарды бірден өту кезінде шабуылдың шапшаң қарқыны сақталады, қарсыластың шабуылдаушы әскерлерден алыстау мүмкіндігі қиындайды. Зақымдалған аймақтардан радиацияның деңгейі төмендегеннен кейін өту жеке құрам бірден өту кезінде сәулеленуге көбірек шалдығатындай болғанда және радиация төмендеуін күту жауынгерлік міндетті орындауға кедергі болатындай жағдайларда жүзеге асырылады. Өту алдында ең қауіпті тұстарды айналып өту жолдарын анықтау үшін барлау жүргізіледі. Өту бағытын таңдау кезінде радиация деңгейінің мөлшері, ядролық соққыдан кейін өткен уақыт, әскерлер жүріп өтуінің ықтимал жылдамдығы есептелінеді. Өту жолдарын анықтауда жеке құрам сәулеленуінің болжамды дозасы негізгі фактор ретінде алынады. Әскерлер зақымданған аймақты бірден өту кезінде саптық реттерін өзгертпейді. Радиация деңгейі жоғары болғанда қорғаныс дәрежелері жоғары бөлімшелер мен бөлімдер бірінші эшелонға шығады. Зақымдалған жерлерде ашық машиналарда жылжитын жеке құрам шаң көтерілген жағдайда газтұмылдырық пен теріні қорғау құралдарын киеді. Танк, ЖҰМ экипаждары және үсті жабық машиналардағы жеке құрам газтұмылдырықтарды ғана қолданады. Аймақтан шыққан соң қажет болса арнайы өңдеу жүргізіледі.